مجلس النواب يرفض الانفتاح على السوق الافريقية لا لشي لتنتغع فرنسا فقط
بالنسبة لموضوع قانون الانفتاح على السوق الافريقية الي ترفض من مجلس نواب الشعب وسقط ب 106 صوت.
الي في التصويرة اللوطة هي قيمة العملة الافريقية (الدول الي تحت شمال افريقيا عندهم عملة موحدة اسمها Franc CFA)
كيما تراو الألف فرنك في الدول هذي يعادل 4800 فرنك توانسة.
بالنسبة للناس الي عاشت وخدمت في افريقيا بش تفهم الي بش نحكيه بالنسبة للي معندوش فكرة هوكا انوروه ميسالش.
في الدول هذي المعيشة الكل تقريبا 5 اضعاف المعيشة في تونس بما يعني:
الباڤات ب 200 فرنك CFA يعني ب960 فرنك توانسة.
حكة طماطم رطل ب 1000 CFA يعني ب 4800 توانسة.
رطل المقرونة ب 400 CFA يعني ب1920 فرنك توانسة
ايترا زيت زيتونة ب6500 CFA يعني 31200 توانسة
اي نعم.. ايترة زيت عندهم ب 30 دينار. و تقريبا كيما حكيتلكم كل شي يتباع ب5 مرات الاسعار في تونس واكثر.
باهي في الدول الافريقية هذي حاجة اسمها مصانع وتصنيع مايسمعوش بيها. معناها عمرك ماتلقى produit local عمرك ماتلقى معمل يصنع طماطم ولا مقارن ولا تن ولا سردينة .. الخ… كل شي يجيبوه من برة.. "النفط والثروات مقابل الغذاء" وشكون يعمل في importation للدول اذومة؟ فرانسا🇫🇷 وفرانسا ماتعبش روحها برشة وتاخذ من رزق شعبها لا. فرنسا تشري من الدول متاعنا وتصدر غادي.
يعني تمشي لسوپرمارشي في بلدان افريقيا تلقى طماطم متاعنا وتلقى مقرونة سپيڤة متاعنا و تلقى هريسة الوطن القبلي متاعنا عليهم طابع فرنسا هي الي مصدرتهم (حكة الهريسة بورطل = 1500 CFA يعني ب 7200 توانسة!! )
ومنغير مانحكيلكم عالغلة (فما دول فيها كان الفلة تروپيكال الاناناس المانغا البنان.. ) فما دول مافيهاش غلة جملة كيما مالي التشاد النيجر .. الدول هذي عادي تكهب على كعبة بطيخ في سوپرمارشي تلقاها ب 50 دينار توانسة ولا كيلو عنب يوصل لل 60 دينار.
المهم مانطولش عليكم
الدول هذي كنز كبير و سوق كبيرة مخلينها على جنب احنا لعشرات السنين و بأوامر من فرنسا اكيد. الدول هذي كان يمشيولها المسؤولين و يعملو علاقات و يوليو يصدرولها في ظرف 10 سنين تونس تخرج من فقرها وتخلص قروضها. بيننا وبينها Vol متع 4 و 5 سوايع اكهو بالطيارة.. الايام الي فاتت كي خرجت حكاية قانون الانفتاح على افريقيا قلنا ايا باهي عالاقل هذي تكون خطوة اولى والقادم افضل.
يجيك نائب راسو كي المحبس يصوت بضد؟ علاه؟ لفائدة شكون؟ الله اعلم . يصوت بضد واكهو.
__احنا التوانسة مدام بش نقعدو كل انتخابات نتعاركو وننتخبو في الشلايك باسم الايديولوجيا والثورة والريق البارد بش نعيشو حياتنا و يعيشو اولادنا واولاد اولادنا في الفقر. ليوم نسبة التداين في تونس حاجة من ورا العقل ليوم ايا مولود تونسي مالي يهبط من كرش اميمتو يهبط موسال 10 ملاين للبنوك الدولية. ياخي فاهمين خطورة الوضع؟ فاهمين الي باش يجي نهار الدول المانحة هذي تقلك يا ترجعلي فلوسي يا نجي نولي ملاك عندك بشركات و معامل ونخدملك ولدك ولا بنتك ب1/10 من شهرية الي نورمالمون يخدم بيها؟ واعين الي احنا باش نخليو لاحفادنا بلاد متداينة فقيرة محكوم فيها ضاربها الفقر والعجز؟
علاه في كل انتخابات شطر يشد الدار و شطر يمشي يسيب بهامتو و السذاجة متاعو ويروح فرحا مسرورا؟
يا اخي عندكم ڤوڤل ويوتوب ادخلو شوفو دول كانت في التسعينات فقر مدقع وتخلف ليوم ولات قوى عالمية ادخلو اقراو وشوفو تجاربهم. الوقت الي تعديوه في فايسبوك اتبعو في اخبار طارق بعلوش و مصطفئ الدلاجي اقراو فيه حاجات هكة.اطلعو فيه عالاقل تولي مواطن على 12 مليون واعي و تعرف تختار. كان كل واحد منا يصلح من روحو تو تتصلح لبلاد.
منقول...
(في لخر.
بش نشوف قداه من واحد كمل قرى الكلام هذا وتفاعل معاه وبش نفشل كي لعادة ونرجع نحكي على كونتوار مايا خليفة ولا الخلفية التاريخية متع هيفاء وهبي ونڤعد رايض.. )
ليست هناك تعليقات